Մեր կուսակցությունը պաշտոնապես սկսեց իր նախընտրական քարոզարշավը։ Այս կարևորագույն քայլի համար մենք որոշեցինք ընտրել Երասխ քաղաքը։ Այս որոշումը հիմնավորված է և ունի խորը իմաստային բովանդակություն։
Երասխը, ավանդաբար, համարվում է Հայաստանի սահմանի, հայ ժողովրդի անկոտրում դիմադրության, պետական ինքնիշխանության և ապրելու իրավունքի խորհրդանիշ։ Այսօր, սակայն, այն դարձել է նաև այն իշխանությունների կողմից տապալված ինքնիշխանության խորհրդանիշներից մեկը։
Մենք ընդգծում ենք, որ թեպետ գործող իշխանությունը հաճախակի օգտագործում է «ինքնիշխանություն» հասկացությունը, իրական իրավիճակը զգալիորեն տարբերվում է այդ խոստումներից։ Երբ Ադրբեջանի պետությունը որոշում է, թե Հայաստանի Հանրապետության տարածքում ինչ տեսակի կառույցներ կարելի է կառուցել, իսկ ինչ՝ ոչ, դա արդեն իսկ ցույց է տալիս ինքնիշխանության խորը ճգնաժամ։