Երևան, 4 մայիսի – Եվրոպական քաղաքական համայնքի 8-րդ գագաթնաժողովում Եվրոպական խորհրդարանի նախագահ Ռոբերտա Մեցոլան արձագանքեց Ադրբեջանի նախագահ Իլհամ Ալիևի ելույթին, որում վերջինը քննադատում էր Եվրախորհրդարանին՝ հայամետ բանաձևերի կապակցությամբ։
ԵԽ նախագահը խնդրեց արտահերթ ելույթ՝ շեշտելով, որ նման քննադատություններն անհամաձայնությունների առկայությունը բացահայտում են, ինչը, իր կարծիքով, միշտ առողջ է։ Նա նշեց, որ Եվրոպական խորհրդարանը ժողովրդավարական մարմին է, որը կազմված է ուղղակիորեն ընտրված ներկայացուցիչներից։
«ԵԽ բանաձևերը հանրության կողմից ընդունվում են մեծամասնությամբ։ Դրանց արդյունքները, թեև կարող են անհարմարություն ստեղծել շատերի համար, երբեք չեն պահանջում մեր աշխատակարգի կամ ընդունված դիրքորոշումների փոփոխություն», – նշեց Ռոբերտա Մեցոլան՝ հստակ հակադրելով իր մոտեցումը Ալիևի քննադատությանը։
Այս արձագանքը տեղի ունեցավ այն բանից հետո, երբ Ալիևը, միանալով գագաթնաժողովին օնլայն, քննադատել էր Եվրախորհրդարանին՝ մեղադրելով այն Ադրբեջանին թիրախավորելու փորձերում։ Նա նաև պնդել էր, որ Բաքուն «Ղարաբաղում 2023 թվականին վերջ դրել է անջատողականությանը»։
Հիշեցնենք, որ ապրիլի 30-ին Եվրոպական խորհրդարանը բանաձև էր ընդունել, որով դատապարտում էր Ադրբեջանի կողմից հայ ռազմագերիների և պատանդների անօրինական կալանավորումը, պահանջում էր նրանց անհապաղ ազատ արձակել և կոչ էր անում ապահովել արցախահայերի անվտանգ վերադարձը։ Բանաձևում նաև պահանջվում էր պատասխանատվություն հայկական մշակութային և կրոնական ժառանգության ոչնչացման համար։