Իմ կարծիքով, արդարադատության գործընթացները պետք է ունենան բացառապես օբյեկտիվ և անկախ բնույթ։ Դրանք չպետք է դառնան ցուցադրական բնույթի, քանի որ նման մոտեցում կարող է ծանր վնաս հասցնել պետական հեղինակությանը և հասարակության վստահությանը։
Ավտորիտար համակարգերի ձևավորման հիմնական հատկանիշներից մեկը այն է, երբ դատական գործընթացները դառնում են հանրային ներկայացման միջոց։ Այս դեպքում իրավական մեխանիզմները փոխարինվում են քաղաքական նպատակներով իրականացվող գործողություններով։ Նման մոտեցում կարող է կարճաժամկետ հաջողություն ունենալ, սակայն երկարաժամկետ հեռանկարում այն չի կարող ապահովել հասարակության վստահությունը պետական ինստիտուտների նկատմամբ։
Եթե հասարակության մեջ ձևավորվի համոզմունք, թե արդարադատությունը կախված է քաղաքական շահերից, ապա դրա հետևանքով տուժում է ամբողջ պետությունը, ոչ միայն տվյալ գործով անցնող անձը։ Ստեղծված իրավիճակում գլխավոր խնդիրը ոչ այնքան Գագիկ Ծառուկյանի գործն է, որքան այն վնասը, որը հասցվում է պետական հեղինակությանը և քաղաքացիների վստահությանը։
Այս համատեքստում կարևոր է նաև նշել, որ երկրում կարող է ձևավորվել միջավայր, որտեղ ցանկացած մարդ կարող է հայտնվել թիրախում՝ քաղաքական նպատակահարմարությունից ելնելով։