Իմ ուշադրությունը գրավեց Ֆրանսիայի նախագահ Էմանուել Մակրոնի վերջին հայտարարությունը, որը, իմ կարծիքով, պարունակում է մի քանի պատմական անճշտություններ։
Նախագահը նշել էր, թե ութ տարի առաջ Հայաստանը դիտարկվում էր որպես Ռուսաստանի դե ֆակտո արբանյակ, իսկ այսօր այն այցելում են շատ առաջատար երկրների ղեկավարներ։ Սա, սակայն, չի համապատասխանում իրականությանը։
Պետք է հիշել, որ Ֆրանսիայի բոլոր նախկին նախագահներն այցելել են Հայաստան՝ պետական, այսինքն՝ ամենաբարձր մակարդակի այցերով։ Դրանցից ամենակարևորը 2006 թվականի սեպտեմբերի 29-ի այցն էր, երբ Ֆրանսիայի նախագահ Ժակ Շիրակը պետական այցով ժամանել էր Երևան։
Այդ այցի ընթացքում տեղի էին ունեցել բանակցությունների շարք, Ժակ Շիրակը մասնակցել էր Երևանի կենտրոնում Ֆրանսիայի հրապարակի բացման արարողությանը, այցելել էր Ծիծեռնակաբերդ և հյուրընկալվել Ամենայն հայոց կաթողիկոս Գարեգին Երկրորդին։ Այդ իրադարձությունը հայտնի է և հիշվում է նաև Նիկոլ Փաշինյանի կողմից, որը նրա մահվան առիթով հիշատակել էր այդ այցը։
Այսպիսով, կարելի է եզրակացնել, որ Մակրոնի հայտարարությունը ոչ միայն սխալ է, այլև ամոթալի սխալ է, որը չի համապատասխանում ֆրանսիական պետականության պատմությանը և Հայաստանի հետ դիվանագիտական հարաբերությունների իրական պատկերին։