Ազգային ժողովի նախագահ Ալեն Սիմոնյանը հայտարարել է, որ չի ափսոսում Բելառուսի կառավարման օրինակը մերժող իր վերջին հայտարարության համար, որը հանգեցրեց Մինսկի կողմից Հայաստանի գործերի ժամանակավոր հավատարմատարի կանչի և բողոքի նոտայի փոխանցմանը։
«Հայաստանը ծայրագավառ չի լինելու, Հայաստանը կախվածության մեջ քաղաքական չի լինելու, Հայաստանը իր ինքնիշխանության մակարդակը՝ քաղաքական և մնացած բոլոր առումներով, բարձրացնելու է, և Բելառուսի կառավարման օրինակը իմ երկրի համար, իմ համար անընդունելի է։ Հայաստանը ազատ երկիր է», – նշել է ԱԺ նախագահը։
Խորհրդարանի խոսնակը հարցին ի պատասխան, թե արդյո՞ք Բելառուսի կողմից արձագանքը նրա հայտարարությանը ավելի չի բարդացնի երկու երկրների հարաբերությունները, նշել է, որ Հայաստանը չի պետք, որ իր շահերը պաշտպանելու համար միշտ նայի և տեսնի, թե Ռուսաստանը հանկարծ չնեղսրտի։
Սիմոնյանը նաև հակադարձել է Բելառուսի ԱԳՆ խոսնակի՝ իր հայտարարությունը «նախընտրական պոպուլիզմ» անվանելու մեղադրանքին՝ նշելով, որ իրավիճակը այնքան էլ ծանր չէ, որպեսզի նման վարժանքներ անեն։ «Ուրիշ մաթեմատիկա է գործում, և ի՞նչ ներքին ճգնաժամ, մի համերգից մյուս համերգ ենք գնում, մի մարդուն դիմավորելուց մյուս մարդուն դիմավորելու ենք գնում, մի պետության հետ, մյուս պետության հետ փաստաթուղթ ստորագրելու ենք գնում», – ասել է նա։
ԱԺ նախագահը նաև հիշեցրել է անցյալի իրավիճակները, երբ, իր խոսքով, Հայաստանը եղել է «ծնկած»՝ իշխանության փոխանցման և պետականության կայացման հարցում կախված լինելով ռուսաստանյան որոշ շրջանակներից։ Նա նշել է, որ 2018 թվականից, և հատկապես 2020 թվականից հետո, Հայաստանը փոխել է այդ «բալանսը»։
Այս հարցումը բացվել էր այն պահին, երբ խոսքը դարձել էր Երևանում Մոսկվայի հասցեին եվրոպական լիդերների քննադատության մասին։ Հիշեցնենք, որ երկու տարի առաջ դեսպանների փոխադարձ հետկանչից հետո սա հայ-բելառուսական հերթական լարվածությունն է։ Երկու երկրներում էլ գործում են դեսպանների փոխարեն գործերի ժամանակավոր հավատարմատարներ։